Fahasalamana: Mila mitandrina sy miaro tena ny rehetra manoloana ny valan’aretina covid-19
Nametraka fepetra indray ny avy ao amin’ny Ministeran’ny fahasalamam-bahoaka mba hisorahana ny fiparitahan’ny valan’aretina covid-19 izay tsy mitsahatra miakatra indray amin’izao. Ampiharina amin’ny faritra 3 ny fepetra fahamailoana amin’ny coronavirus dia i Analamanga sy Vakinakaratra ary Matsiatra Ambony. »Ho fanapahana ny rohimpifindran’ny valan’aretina dia hamafisina ny fampiaharana ireo fihetsika sakana efa mahazatra teo aloha izay tsy maintsy atao toy ny fametahana aro-vava orona sy ny fanasana tanana ary ny fanajana ny elanelana 1 metatra sy ny maro hafa » hoy ny Minisitry ny Fahasalamam-bahoaka, Pr Zely Arivelo Randriamanantany. « Mila mitandrina mandrakariva isika manoloana ity fahavalo iraisana ity ka asa misalasala manantona ny tobim-pahasalamana raha tsy metimety satria maimaimpoana ny fitsaboana ity aretina ity manerana ny CSB II rehetra » hoy i Dokotera Fidy. »Vahaolana ny fanaovam-baksiny saingy manana ny safidiny ny rehetra, ka samia tompon’andraikitra amin’ny fahasalamany avy, sarobidy loatra mantsy ny ainy ary tsy ananam-piry » hoy i Gerard, mpampianatra eny amin’ny anjerimanontolo. Tompon’andraikitra amin’ny fahasalaman’ny hafa ihany koa isika ka tokony hiaro tena tsara tsy hamindra amin’ny ankohonana ho fiarovana azy ireo. Ny fanantonana ny tobim-pahasalamana no tena vahaolana raha misy tsy fahasalamana fa tsy mety ny mitsabo tena irery. Hafa mihitsy izany miresaka amin’ny mpitsabo izay efa manana fahalalana amin’ny fahasalamana.
Nicole Rafalimananjara
