Fizahantany : Nandroso vahaolana ny Ministra

Nisy ny fihaonana nataon’ny Minisitry ny Fizahantany tamin’ireo mpandraharaha eo amin’ny sehatry ny fizahantany tao Nosy Be izay niresahana indrindra ny fiverenan’ireo sidina iraisam-pirenena any an-toerana. Maherin’ny 160 ireo mpandraharaha nanatrika ity fihaonana ity, niaraka tamin’ireo manam-pahefana any an-toerana.

« Tsy azo ihodivirana anefa ny resaka fahasalamana ao anatin’izay fanapahan-kevitra rehetra horaisinaho fiarovana hatrany ny mponina, manoloana ny aretina covid-19 » hoy ny minisitry ny Fizahantany, Randriamandranto Joel. « Mila omena lanja hatrany anefa ny fizahantany eto anatiny mba tsy ho tompon-trano mihono isika » hoy i Herilanto, mpandraharaha amin’ny fizahantany any Nosy Be. « Na izany aza mila jerena akaiky ny olan’ny fizahantany mifanaraka amin’ny fahasalamam-bahoaka manoloana izao fiparitahan’ny aretina izao mba tsy hidiran’ny variant oMicron eto amintsika indray » hoy i Lanja, mponina any Nosy Be Hell Ville.

Marihina fa efa mikatona amin’i Afrika Atsimo ny habakabak’i Madagasikara amin’izao noho ny fisian’ny variant oMicron any amin’ny firenena sasany any Afrika.

Nicole Rafalimananjara