Alasora : Mitohy ny asa fanamboaran-dalana

Mitohy hatrany ny asa fanamboaran-dalana ao amin’ny kaominina Alasora amin’izao fotoana izao. Lalana miakatra mankao amin’ny tampon’Alasora indray no nanohizana ny fanamboarana sy fanatsarana ny faran’ny herinandro teo.

« Ao anatin’ny ezaka ataon’ny kaominina ny asa fanamboarana ireo lalana izay misy fahasimbana. Hitohy hatrany izany asa izany ho tombotsoan’ny rehetra » hoy ny avy amin’ny kaominina.

« Tena ilaina be ny fanamboaran-dalana tahaka izao. Maro be ireo lalana simba, indrindra taorian’ny fahavaratra iny ka tokony jerena hatreny ifotony. Maro ireo lalana simba makeny amin’ireo fokontany » hoy i Felana, mponina ao Alasora.

Maro ireo lalana simba ka mila fanamboarana, izay mampitaraina ny mponina ao Alasora. anisan’izany ny lalana mankao Ambodivoara, Ampangabe Anganomasina, Ambohitanety, Ambohimarina sy ny maro hafa.