Firotsahana an-tsitra-po : Feno dimy taona katroka ny fikambana Ank’Izy

Feno dimy taona katroka ny 10 martsa lasa teo ny fikamban’ny mpilatsaka an-tsitra-po « Ankin’ny Hoavy Izy » (Ank’Izy). Fikambanana manohana ireo ankizy eny amin’ny Sekolim-panjakana ny Ank’Izy. Manampy amin’ny fampidirana an-tsekoly ny ankizy sy ny fampiakarana ny lentan’ny fampianarana.

« Mila antsika tanora ireo ankizy indrindra ireo sahirana. Mila antsika hizara hafaliana izy ireo. Dimy taona izay no nisian’ny Fikambanan Ank’Izy niaraka tamin’ireo mpiara-miasa aminy. Maimaim-poana avokoa ny hetsika ataonay ho an’ny ankizy eto Madagasikara. Efa miparitaka manerana ny faritra maro eto Madagasikara izy » hoy i Ranoelimanana Dimby, filoha mpanorina ny fikambanana Ank’Izy.

« Mahafinaritra ity fikambanana ity. Tanteraka tokoa ilay hoe sambatra ny manome noho ny mandray. Mahafinaritra ny miaraka amin’ireo tanora mpikambana sy ireo ankizy tolorana hafaliana. Tsy nanenenako ny niditra tato » hoy i Jessica, mpikambana.

Miditra amin’ny sehatra maro ny fikambanana. Manabe ny olona amin’ny alalan’ny fampianarana an-tsekoly izy, fanajana ny tontolo iainana, fanajana ny zon’ny ankizy sy ny maro hafa. Fikambanana tena manampy ny olona tokoa ary mitondra any amin’ny fampandrosoana ny firenena.

Nicole Rafalimananjara