RN7 : Efa niverina ny fifamoivoizana ao amin’ny PK 732+200 Ilakaka
Efa nisokatra ho an’ireo fiara rehetra ny fivilianan-dalana, izay mirefy 10 km amin’ny lalam-pirenena fahafito. Eo amin’ny PK 732+200 anelanelan’Ihosy sy Sakaraha, izay tapaka noho ny fiakaran’ny rano tamin’ny fandalovan’ny rivo-doza Emnati, ity fivilianana ity.
« Efa niverina amin’ny laoniny ny fifamoivoizana ao amin’ny RN7 ankehitriny. Ialana tsiny noho ny fanelingelenana noho ny fanamboarana » hoy ny avy ao amin’ny Minisiteran’ny Asa Vaventy. « Tena nanimba ny lalana ny fiakaran’ny rano nandritra ireny andro ratsy ireny. Isaorana ny tompon’andraikitra nandray an-tanana haingana ny fanarenana ny lalana » hoy i Haja, mpamily fiarakodia.
Antoky ny fampandrosoana tokoa ny fahatsaran’ny lalana. Mila fikojakojana avy amin’ny mpampiasa lalana ihany koa izy ireny mba hateza tsara. Tompon’andraikitra amin’ny fampandrosoana ny rehetra.
Nicole Rafalimananjara
