Ankadikely Ilafy : Hisy ny fitsirihana isam-pokotany mahakasika ny fahadiovana
Ao anatin’ny ezaka fanentanana amin’ny fahadiovana sy ny fanadiovana ny kaominina Ankadikely Ilafy, amin’izao fotoana izao. Ao anatin’izany indrindra, hanatanteraka fandehanana eny ifotony, eny amin’ny isam-pokotany ireo tomponandraikitra misahana ny resaka fanadiovana sy fidioavana ao anatin’ny kaominina Ankadikely Ilafy, hanao ny fitsirihana ny isan-tokatrano ny fananana na tsia ny toeram-pivoahana sy fanariana rano maloto.
« Hisy ny fifanarahana sy ny fepetra hapetraka mandritra izany fitsirihana izany ary hisy ny sazy ho apetraka ho an’ireo tsy manatanteraka. Ny tanjona tanjona ao anatin’izany dia ny hananana fiaraha-monina mifanaja ao anaty fahadiovana, koa manainga ny rehetra amin’ny fiaraha-mientana » hoy ireo tomponandraikitra ao amin’ny kaominina.
« Ilaina ny fampandraisan’andraikitra ny isan-tokatrano tahaka izao. Anisan’ny olana mahatonga ny tsy fanarahan-dalàna anefa ny figoragoran’ny sazy izany apetraka ho fifampifezana amin’ny resaka fahadiovana, izay hanaovana antso avy amin’ny tomponandraikitra satria tombotsoa iombonana ny lafin’ny fahadiovana » hoy i Rova, mpanao volo.
Ny fiaraha-mientan’ny rehetra, mpiara-monina no hahafahana miaina anaty tontolo madio, mirindra sy mahatamana, indrindra mahasalamana. Samy tomponandraikitra ny tsirairay ary tokony ho sarotiny manoloana ny fahadiovana sy filamin’ny tanàna.
Manitra Ramanantsoa
