Ihorombe : Nisitraka fitaovam-pamokarana ireo tantsaha mpamokatra 

Vondron’ny tantsaha mpamokatra miisa 8 ao anatin’ny faritra Ihorombe no nisitraka fanampiana ara-pitaovam-pamokarana sy famatsiana biby fiompy Izany dia mba ahafahan’izy ireo mampivelatra sy mampiroborobo ny sehatra fiompiana izay efa niveloman’izy ireo teo aloha.

« Anisan’ny tena miavaka tao anatin’ny fanampiana ny fanomezana ondry miisa 258, omby vavy be ronono miisa 2, sy kibôta miisa 2,. Hinoana fa efa manampy betsaka azy ireo handroso hatrany izany » hoy ny avy ao amin’ny minisiteran’ny fambolena sy fiompiana. « Misy mpamokatra miisa 165 ato amin’ireto vondrona nahazo fanampiana ireto. Hanatsarana ny seha-piharian’izy ireo ho fandraisana anjara amin’ny fahatrarana ny fahavitan-tena ara-tsakafo no tena tanjona » hoy ny tompon’andraikitra ao amin’ny prosperer.

Tamin’ny alalan’ny fandaharan’asa « Fonds de Développement Agricole » (FDA), ao amin’ny minisitera ary vatsian’ny FIDA vola, no nahafahana nanatanteraka ny hetsika. Endrika mivaingana amin’ny fanohizan’ny FDA ireo andrikitry ny PROSPERER izao, izay misahana ny fanohanana ny tantsaha mpamokatra. 

Nicole Rafalimananjara