Manakara : Tra-pahavoazana noho ny rivo-doza indray
Mbola mitohy ny rotsak’orana ao Manakara androany 23 febroary 2022 na dia somary efa tony aza ny rivotra. Betsaka ny fahavoazana hita tany an-toerana noho ny fandalovan’ny rivo-doza Emnati toy ny hazo tapaka, ny fiakaran’ny rano, ny trano nirodana, ny lalana nihotsaka.
« Tonga teto Manakara alina manko ny rivo-doza. Efa nanomboka omaly talata no nisy ny orana mikija. Tafiditra tao anatin’ny faritra mena i Manakara. Mponina maherin’ny 7 000 no voatery nafindra toerana » hoy ny tompon’andraikitra ao amin’ny Faritra Vatovavy. « Efa nanomboka ny talata hatramin’izao no tapaka ny jiro teto Mananjary. Sarotra ihany koa ny tamba-jotran-telefaonina eto amin’izao. Efa manomboka mivoaka manarina izay azo atao ny mponina amin’izao » hoy i Mika, mponina ao Mananjary.
Efa tafiditra ao anatin’ny fanambarana miloko manga ny faritra Vatovavy amin’izao. Mila mitandrina hatrany amin’ny mety ho aterakin’ny fahavoazana. Mbola miakatra rahateo ny rano amin’izao.
Nicole Rafalimananjara
