Sakafo : Maro ireo sakafo tsy tsara ampiarahana, manasarotra ny fandevonan-kanina
Maro ireo sakafo fihinana isan’andro zatra ampiarahina nefa tsy tsara miaraka. Anisan’izany ny kôkômbra sy voatabia izay hafangaro matetika rehefa manao lasary.
Ny fifangaroan’ireo vokatra roa ireo nefa dia mety hiteraka rivotra (gaz intestinaux-ballonnement). Ny antony dia manodidina ny 95% eo ny rano ao anatin’ny kôkômbra ka mora levona izy, ny voatabia kosa dia ela vao levona izay tsy tsara ho an’ny fandevonan-kanina.
Tafiditra ao anatin’ireo sakafo ireo ihany koa ny ovy sy ny hena. Tsy tsara miaraka ny proteina sy ny « féculent», antony ny tsy fitovian’ny làlan’ny fandevonan’ny « amidon » ao amin’ny « féculent » sy ny proteina ka mahatonga ny vavony havesatra.
Ankoatra izay dia tsara fadiana ihany koa ny fifangaroan’ny kafe sy ny ronono velona. Misy singa antsoina hoe « tanins » ao amin’ny kafe mampivaingana ny « caséine » na ny proteina ao anaty ronono izay hita ao amin’ny ronon’omby sy ondry aman’osy ka nampiadana ny fandevonan-kanina.Mbola maro ireo sakafo fihinana amin’ny fiainana andavanandro hafangaro manasarotra ny fandevonan-kanina ireo. Maro ireo efa mahatsapa fa mahavesatra ny vavoniny na misalebolebo izy rehefa mihinana izany.
