Avaradrano : Raraka nanoloana an’i Masindray i Talata Volonondry

Mitohy hatrany ny lalao baolina kitra hifaninanan’ny Kaominina rehetra ao Avaradrano. Nivoaka ho mpandresy nanoloana ny kaominina Talata Volonondry tamin’ny isa 4 noho ny 3 ny kaominina Masindray.

« Mitohy hatrany ny ezaka izay isaorana ireo mpitondra fanjakana rehetra eto amin’ny Kaominina Masindray izany ary tadidio fa ny firaisan-kina no hery » hoy i Fidy, mponina ao Masindray. « Mila miaro ny voninahitry ny Kaominina avy ny tsirairay, ary izany no mitombo tsikelikely ho lasa voninahitry ny firenena. Ny fanatanjahan-tena tahaka izao dia ahafahana mampandroso ny firenena » hoy i Sitraka, mpilalao baolina ao Talata Volonondry. « Fanamafisana hatrany ny firalahiana eto Avaradrano no nanaovana ity lalao ity ary isan’ny fomba iray ho entina hampandrosoana ny Distrika iray manontolo mihitsy » hoy ireo mpikarakara.

Lalao ara-pirahalahiana tokoa ka izay nandresy tsy hobiana ary izay resy tsy hankoraina. Tsy tokony hisy ny ady mandritra ny lalao fa tokony samy mahay mankafy ny lalao rehetra.

Nicole Rafalimananjara