Kaominina Ambohimanambola : Fitsinjovana ny mponina ho afa-pahasahiranana amin’ny rano
Misedra tsy fahampian-drano avokoa ny ankahamaroan’ireo kaominina eto Antananarivo renivohitra amin’izao fotoana. Nitady vahaolana maharitra manoloana izany ny kaominina Ambohimanambola ka nanokatra ny serivisy misahana ny « Rano fahadiovana fidiovana » ao amin’ny kaominina varavarana laharana voalohany, misokatra ho an’ny daholobe.
« Entina hiarovana ny zon’ny mpanjifa amin’ny fisitrahana rano madio » izany hoy ireo tompon’andraikitra ao amin’ny kaominina. Nanamafy izy ireo fa ho hatsaraina ihany koa ny servisy ka efa misy adresy mailaka sy laharana finday ahazoana az ireo. « Anisan’ny tena mety ny fanasiana ny vata manga andatsahanay ny fitarainana sy ny soso-kevitray fa enga anie mba tena raisina ilay izy » hoy kosa i Liza, mponina ao an-toerana.
Mangataka fanitarana io tolotra io kosa ireo mponina ao Ambohimanambola mba ho tonga any amin’ny tànana misy azy ireo. Miantso ireo tompon’andraikitra izy ireo manoloana izany.
Hasina Rasamimanana
