Avy aiza no niavina’ilay teny hoe « Andrononobe » ?

Fokontany iray ao anatin’ny Kaominina Ankadikely Ilafy, Distrikan’Antananarivo Avaradrano no misy an’Andrononobe, izay manana velarantany 1,38 Km².

Miisa 12 229 ny mponina ao amin’ity Fokontany iray ity izay manana vakimparitra telo : I AB, II AB, III AB. Ambohidronono no niantsoana azy tany am-piandoahana saingy rehefa ho any Ambohitrarahaba ny mpanajaka Andrianampoinimerina dia naka aina tao amin’ity toerana ity ka nitady rano hanasana ny tongony sy ho sotroina. « Nisy rano be tao Ambohidronono dia nosoloiny Andranobe indray ny anaran’ilay tanàna ary noho izy fiatohan’ny andriana hakana aina kosa dia novaina hoe Andriamiato indray » hoy i Augustin, mpahay tantara.

Mbola mponina vitsy no tao an-toerana tamin’izany ka nandray sy nanome ronono ny mpanjaka izay maka aina tao ary noho ny fisitrahan’ny mpanjaka izany fandraisana azy izany indray dia novaina hoa Andrononobe ny anaran’ny toerana. « Misy anarana mipetraka kely toy izay avokoa manerana ny vakimparitra eto, toy ny « Ambohiberonono », « Ambohidronono izay samy nisy antony avokoa ny antony namoronana ny anarany » hoy i Randrianarimanana Jean Charles, sefo fokontany ao Andrononobe. « Tanàna mahafinaritra sy maha te honina Andrononobe ary efa nampiavakla ny mponina hatramin’izay mihitsy ny fahaizana mandray ny vahiny » hoy i Esther, mponina ao an-toerana. Mirakitra tantara maro ity Fokontany iray ity, izay loharano nipoiran’ny famoronana ny anaran’ireo tanàna.

Nicole Rafalimananjara