Nicolas Dupuis : Ny Komitim-panatanteraka ao amin’ny FMF sa ny filohan’ny FMF irery no tompon’ny teny farany ?

Nanomboka ny taona 2017 no nidiran’i Nicolas Dupuis, tera-tany Frantsay, ho mpanazatra ny ekipam-pirenena baolina kitra lehilahy teto Madagasikara. Isan’ny lohahevitra nalaza tamin’iny herinandro iny ny fanesorana azy tamin’izany toerana izany, Ny 7 tamin’ny 10 tao amin’ny komity mpanatanteraka no nanaiky ny hitazomana azy tao amin’ny toerana ary ny 3 ambiny no nandà ny hanohizany noho ny farany anefa niala ihany izy. Hanao ahoana ny hoavin’ny baolina kitra Malagasy indrindra amin’izao fanomanana ny « Mondial » izao ? Tsy mitovy hevitra ny komity, iza no tena tompon’ny hevitra farany ? Ny FMF ? Ny filohan’ny FMF irery sa miaraka ireo mpiara-miasa aminy ? Ahiana ho misy asy an-trano kanefa aoka tsy ny baolina kitra malagasy no atao sorona.  Sahirana ny baolina kitra ary tojo tsy fahombiazana tamin’ny farany teo. Hiteraka fiovana ve ny fanovana ny mpanazatra ? Aoka tsy hisy fijerena tavan’olona fa izay hamapandroso ny Baolina no himasoana. Tsy misy hirarahian’ny filohan’ny federasiona ny baolina eto an-toerana noho izy mivezivezy any ivelany hany ka mandringa sy lasa an-kilabao ny baolina kitra hoy i Rakotoarimanana Tôta, filohan’ny ligue Analamanga tao amin’ny fahitalavitra tsy miankina iray ny 1 Mey teo. Inona ny vahaolana ? Tsy mijery izay filoha anefa ny olona fa ny vokatry ny lalao no tena tsaraina. Izany hoe tompon’andraikitra lehibe izay mpanazatra ny mpilalao manoloana izany fitsarana izany.

Nicole Rafalimananjara