Nidina ny isan’ireo narary tao anatin’ny 15 andro
Tsy nisy firenena naniry ny ho tratran’izao aretina izao fa kosa tsy miatrika izany isika ary anatin’izany indrindra no ilàna ny fiaraha-mientan’ny rehetra manoloana izao valan’aretina izao. Tsikaritra ankehitriny fa nihena ny isan’ireo narary, teo ny fahatongavan-tsainan’ny vahoaka, teo ihany koa ireo fepetra noraisin’ny mpitondra fanjakana satria raha ny 4 ka hatramin’ny 18 aprily dia 7 226 ny isan’ny marary, 4530 kosa izany ny 15 andro taty aoriana. Raha tany Mahajanga no nidiran’ny « variant Afrique du Sud », vitsy sisa ireo marary any an-toerana hoy ny filoham-pirenena omaly Alahady 02 mey 2021, nandritra ny fandaharana manokana nampitain’ny TVM sy RNM. Na izany aza anefa, mbola anaty ady isika manoloana izao areti-mandoza izao izay hita fa tsy mora izany. Koa tsy hitandro-hasasarana ireo mpitondra sy ny tompon’andraikitra manoloana ny adidy goavana amin’ny vahoaka. Mbola anatin’ny hamehana ara-pahasalamana hatrany isika izao ary mbola mihatra hatrany ireo fepetra ara-pahasalamana napetraka. Nohalefahana kosa ireo fepetra vaovao horaisina amin’ity 15 andro manaraka ity, isan’izany ny famerenana ireo mpianatra hanala fanadinam-panjakana any an-dakilasy indray. Voafehy ve izany ny aretina ? Tsy hatahorana hiakatra intsony ve ny isa ?
Nicole Rafalimananjara
