Nifampidinika tamin’ny orinasa Jirama ny fikambanan’ny mpanjifa.
Mitsangana miaro ny mpanjifa amin’ny sehatry ny resaka fanjifana rehetra ny fikambananan’ny mpanjifa. Anjaran’ireo solontena ireo no mitondra ny hetahetan’ny mpanjifa any amin’ny tompon’andraikitra mahefa izany. Rehefa misy ny fotoana mampiakatra ny vidin’ny fanjifana, na ihany koa misy ny tsy fifankahazoana eo amin’ny mpanome tolotra sy ny mpanjifa, tsy maintsy manelanelana mikaroka ny marimaritra iraisana izy ireo. Ireo tolotra sy fitaovana, izay tsy afa-misaraka amin’ny vahoaka moa matetika no tena mampijoro ny fikambanana tahaka izao. Ohatra hitantsika matetika ny fitsanganan’ny mpiaro ny zon’ny mpanjifa amin’ny fiakaran’ny vidin’entana ilaina andavanandro. Fa anisan’ny manana tolotra ilain’ny rehetra ny orinasa Jirama. Henontsika matetika anefa ny fitarainana avy amin’ny mpanjifa momba ny jiro sy ny rano. Ohatra amin’izany ny fiakaram-bidy amin’ireo sehatra ireo, izay saika mampikolay ny maro. Vokatr’izany indrindra no hijoroan’ny fikambanan’ny mpanjifa, izay mitondra ny mahatery ny vahoaka amin’ny ankapobeany, ary mametraka marimaritra iraisana. Nisy araka izany ny fihaonana teo amin’ny tompon’andraikitry ny Jirama sy ireto fikambanana ireto. Nisy ny fifampiresahana mazava manoloana izany. Tafiditra tamin’ny dinika nifanaovana ny fampahafantarana ny asa sy ny fepetra samihafa raisin’ny Jirama, teo ihany koa ny fahitan’ny mpanjifa ny fakana mivantana ny tarehimarika amin’ny kaontera, ny tolotra antso an-tariby 3547, ny kaontera aloha mialoha, ny saran’ny faktiora vaovao, ny fifandraisana amin’ny aterineto, ny fanavaozana ny fotodrafitr’asa. Teo ihany koa ny fampahafantaranan’ny Jirama ny tolotra atao sy hatao ho an’ny mpanjfa. Noresahana ihany koa ny fahazoan’ny mpanjifa mitsidika tampoka ny masohivohon’ny Jirama, hanombohana ny asany sy ny fivoaran’ity orinasa ity. Teo ihany koa ny fanomezana tolo-kevitra hoentina manatsara ny tolotra Optima, raha nilaza ny tombotsoany kosa ny Jirama. Tapaka tamin’izany fa hotohizana ny fihaonana tahaka izao mba hisian’ny fiaraha-miasa sy ny fahafantarana ny tena hetahetan’ny mpanjifa.
Fanilo Rarivoarilala
