Ambohimangakely: Lehilahy iray nampidirina eny Antanimora noho ny fanodikodinana zaza tsy ampy taona

Tovoloahy iray no voatazona vonjimaika eny Antanimora, rehefa avy natao famotorana teny amin’ny fitsarana ny faran’ny herinandro teo. Voalaza fa nanodikodika zaza tsy ampy taona ity lehilahy ity.

“Ny 18 may no nanomboka tsy hita tao amin’ny tranon’ny ray aman-dreniny teny Ambohitremo Ambohimalaza ny zazavavy iray ka nampandre ny zandary avy hatrany izy ireo. Rehefa natao ny fanadihadiana sy ny fikarohana dia hita tao Ambodivoara Ambohimangakely izy ny 20 may. Tovolahy iray no nitondra azy antsokosoko” hoy ny avy amin’ny zandarimaria.

“Maro ireo trangana zaza very tato ho ato. Be dia be ny antony mety mahatonga izany na ao an-tokantrano na eny amin’ny fiaraha-monina. Ny vahaolana enti-misoroka izany dia ny eo amin’ny fitaizana sy fanabeazana, indrindra ny fifampiresahana eo amin’ny ray aman-dreny sy ny zanaka mba hisorohana ny fahapotehan’ny ankizy, indrindra amin’izao fotoana” hoy i Amy, mpianatra psychologie.

Marihina moa, fa nandritra ny famotorana ity lehilahy ity dia niaiky fa efa nomaniny ny fitondrana nitsoaka ilay zazavavy tsy ampy taona ary efa nisy ny firaisana ara-nofo teo amin’izy ireo. Voamarina teny amin’ny  tobi-pahasalamana izany rehefa nentina teny ilay zazavavy.