Ambohimangakely: Misokatra ho an’ny rehetra ny fampianarana

Maro ireo fampianarana maimaim-poana ho hita ao amin’ny kaominina Ambohimangakely ato ho ato. Misokatra ho an’ny rehetra ary tsy mifidy taona ny fampianarana, araka ny voalaza.

« Anisan’ny nahavariana nandritra ny fanombohan’ny fampianarana teny japoney teo, maro ireo tanora avy any alavitra no tonga hianatra teto an-toerana. Nisy ireo avy any Ivandry, Ankatso, Ampitatafika, Ambohidratrimo sy Analakely no tonga nanovo fahalalana teto amin’ny kaominina » hoy ireo tomponandraikitra.

« Tsy mahasakana ny fikaroham-pahalalana ny alavirana. Izany no hanentanana hatrany ireo tanora hianatra sy hilofo ary hazoto hatrany fa ny fampianarana no fototra raha te handroso sy hivoatra amin’ny fiainana » hoy i Haja, raim-pianakaviana.

Amin’izao fotoana, dia ny fampianarana teny japoney no efa manomboka ao amin’ny kaominina Ambohimangakely. Isaky ny zoma ny fampianarana ao amin’ny EPP Antanambao, amin’ny 2ora sasany hatramin’ny 4ora hariva.