Miseho amin’ny endrika samihafa ny fisolokiana eto an-drenivohitra

« Tsy milamina avokoa izay tany aleha » hoy ity tovovavy iray nisy nikasa hanapa-bolo teny Behoririka ity. « Mody mampiresaka izy hoe amidy ve dia avy eo arahiny ianao rehefa tsy manaiky » hoy izy.

Ankoatra io fanapahana volo io dia endrika maro no hita eny amin’ny fiaraha-monina eny ankehitriny. Raha ny fitantaran’ny vavolombelona iray dia ireo mpanao ratsy indray no mametraka ny tenany ho lasibatra. « Mody mifandona aminao izy ary tampoka eo alatsany ny solomaso eny an-tànany ohatrany hoe nodominao izany dia mitaky aminao izy 100 000 Ar tetibidin’ilay solomaso, fa raha tsy misy vola any aminao dia izay zavatra eny aminao no tereny omena azy » hoy izy.

Ambodivona, Antsahavola, Ampefiloha, Ambohijatovo sy eny amin’ny manodidina aloha hatreto no tena matetika isehoan’ny tranga.

« Efa miezaka ny manara-maso izany izahay » hoy kosa ny eo anivon’ny fintandrovana ny filàminana. Efa maharay tatitra izy ireo fa manao satroka bonetra mainty ilay mpanao izany eo Ampefiloha ary milanjalanja solomaso mainty.

Hasina Rasamimanana