Ady any Ukraine : Tobin-tsolika roa nirehitra noho ny fanafihana tamin’ny alalan’ny « drone »

Toeram-panatobiana solika roa no notafihan’ny « drone » omaly maraina tao Orel sy Kstovo, tanàna rosianina, any amin’ny 160km miala ny sisin-tany okrainianina sy any amin’ny 450 km any atsinanan’i Moscou, araka ny fanambarana nataon’ny governoram-paritra any an-toerana. Niteraka firehetana tao amin’ireo toerana ity fanafihana ity. Taorian’ny nisian’ny fipoahana, niezaka nifehy ny afo ireo mpiasa avy amin’ny sampan-draharaha tao an-toerana. Nanambara izy ireo fa tsy nisy ny naratra na ny aina nafoy nandritra izany. Manodidina ny tamin’ny 3ora maraina, ora tany an-toerana no nitrangan’ny fanafihana ka nahamaizan’ity toeram-panatobiana soli-tany ity. Ankoatra io, dia nisehoana fanafihana tamin’ny « drone » ihany koa tao an-tanànan’i Belgorod ny alin’ny alatsinainy hifoha talata, tsy nisy ny naratra saingy nisy kosa ny fahasimbana teo amin’ny fitaovana mampita herinaratra. Vokatr’izany, kaominina miisa fito no tsy misy jiro.