Ambohimanambola : Hisy fahatapahana ny lalana ao amin’ny fokontany Gara
Hisy ny fahatapahan-dalana ao amin’ny faritra Gara, faritra fahatelo, araka ny fampilazana nataon’ireo tomponandraikitra avy ao amin’ny kaominina Ambohimanambola sy ny orinasa Somatrafer. Haharitra telo andro izany fahatapahan-dalana izany, raha ny voalaza hatrany.
« Ho tapaka ny làlana eo amin’ny fokontany Ambohimanambola Gara lalana manapaka ny lalamby atsimon’ny Gara Be ny zoma faha 09 febroary 2024 manomboka amin’ny 08 ora alina hatramin’ny Alahady 11 febroary 2024 maraina. Izany dia nohon’ny fanamboarana ataon’ny Orinasa Somatrafer izay miandraikitra ny lalamby » hoy ny avy amin’ireo tomponandraikitra.
« Anisan’ny nitondra fiovana ny fanamboarana ny gara ity, misongadina izany eo amin’ny endriky ny tanàna sy ny fandaminana isan-karazany tahaka izao fanamboaran-dalana izao. Antenaina mba hitohy hatrany izany satria mitondra fandrosoana ho an’ny kaominina indrindra indrindra » hoy i Vero, mponina ao Ambohimanambola
Ao anatin’izany fanamboarana izany moa no hanentanan’ny tomponandraikitra ny rehetra mba samy hanaja sy hanaraka ny fandaminana napetraka.
