Ankadikely Ilafy: Lehilahy iray maty voahitsaky ny camion lehibe

Nisehoana lozam-pifamoivoizana mahatsiravina tao Ambohitrarahaba, Ankadikely Ilafy, ny faran’ny herinandro teo. Lehilahy iray nitondra bisikileta no maty tsy tra-drano, voahitsaky ny kodiaran’ny fiara lehibe iray ny lohan’ity farany, raha ny voalaza.

« Nampihorin-koditra ny zava-niseho teto Ambohitrarahaba. Tena ilaina ny mitandrina amin’ny fiainana fa tsy mampilaza tokoa ny loza ary tokony ho mailo hatrany eny an-dalana eny » hoy i Tojo, mpivarotra eo amin’ny manodidina.

« Na dia tsy mampilaza aza ny loza dia ilaina hatrany ny mitandrina, indrindra ny fanajana ny lalànan’ny fifamoivoizana eo amin’ireo mpampiasa ny lalana, dia ny mpamily sy ireo mpitondra tongo-droa » hoy i Hanta, mponina ao Ambohitrarahaba.

Natao mba ho anatra sy fampitandremana ny rehetra ny loza tahaka izao. Nampametra-panontaniana ny maro, manoloana ity tranga ity anefa ny mahakasika ny fandehan’ity fiara lehibe ity ny atoandro, raha tokony ny alina ihany no fotoana ahazoan’izy ireo mivezivezy.

Manitra R.