Mayotte : Manohana ny hetsika « Wuambushu » ny filankevitry ny departemanta
Mitohy ny hetsika « Wuambushu » izay karaikarain’ny ministeran’ny atitany ao Mayotte. Nanao fanambarana ho an’ny mpanao gazety ny filankevitry ny departemanta ao an-toerana fa manohana ny hetsika ary nanazava ny maha-zava-dehibe an’izany. Raha tsiahivina dia entina hiadiana amin’ny fifindra-monina tsy ara-dalàna sy handravana ireo trano bidonville io hetsika io.
Raha ny tatitra dia antsasaky ny mponina 350 000 ao Mayotte no tsy manana zom-pirenena frantsay. Antony mampitombo ny tsy fananan’asa sy ny mampirondratra ny heloka bevava ao an-toerana raha ny fanamafisan’ny tompon’andraikitra. Maro kosa nefa ireo fikambanana manamoloka ny hetsika ary misokajy izany toy ny hesiretra, fankahalana ireo sahirana ary fanitsakitsahana ny zon’ny mpifindra monina.
