Alasora : Hanatanteraka ny fandoavana hetra-trano ny fokontany Ambohimarina

Anjaran’ny fokontany Ambohimarina, Alasora, izao no hanatanterahan’ny kaominina ny fandehanana ifotony amin’ny fandoavana ny hetra-trano. Anio alatsinainy 24 aprily sy rahampitso talata 25 aprily izao no fotoana hanefan’ny mponina izany eny amin’ny biraom-pokontany, raha ny voalaza.

« Ho avy eny amin’ny biraon’ny fokontany ny kaominina hanatanteraka izay hetsika izay ka manentana ny mponina hanefa izany satria ny fandoavana hetra no antoky ny fampandrosoana ny tanàna » hoy ny tomponandraikitra avy amin’ny kaominina.

« Zava-dehibe no antony hanefana ny hetra. Io no ahafahan’ny kaominina manao foto-drafitr’asa na ezaka fanatsarana ny tanàna, ary tamberin’andraikitra tokony hataon’ny kaominina izany rehefa mandray hetra izy. Ny fampahafantarana sy ny fanentanana no tokony hamafisina » hoy i Ando, mpianatra ho économiste

Anisan’ny olana lehibe ary mahatonga hevi-draikitra amin’ny mponina ny mahakasika ny hetra. Misy ireo tsy mbola mahafantatra ny antony handoavana izany ary tsy ampy ny fanentanana mampahalala izany, izay sakana ho an’ny fampandrosoana.

Manitra R.