Tsy fandriam-pahalemana : Conteneur iray nisy fanafody tsy hita popoka

Nanambara ny « Office Pharmaceutique Malgache » na ny Opham fa very ny conteneur iray nisy fanafody tao amin’ny seranan-tsambo Toamasina.Araka ny fanambarana ny Opham ny Talata 10Aogositra 2021, baoritra fanafody miisa 1 360 isa no tao anatin’izany conteneur izany, ahitana Amoxiciline, Ibuprofen, Ampicilline ary Peniciline.Mahavarina ny maro ny fanjavonan’ny conteneur iray tao amin’ny seranan-tsambo ka nampiteraka resa-be teo amin’ny fiaraha-monina sy ny tambanjotra-tserasera : « tena loza mahavariana izany fahaverezan’ny conteneur iray be izao izany ! » hoy ny fanehoan-kevitry i Meva. « Izahay izao efa very gony iray tao amin’io seranantsambon’i Toamasina io, fa ity kosa conteneur feno fanafody » hoy i Désiré, zendana tanteraka ny amin’izany raharaha izany. »Misy afera maloto ao ambadik’izao halatra izao » hoy ny fanehoan-kevitra ny sasany. Izany seranan-tsambo izany ve moa tsy tokony hanana tompon’andraikitra mpanara-maso ny entana mivoaka sy miditra ? Na hanana fitaovana fanaraha-maso toy ny « caméra » sy fitaovana fanaraha-maso (matériel de localisation) ? Noho izany miantso ny rehetra ny biraon’ny Opham amin’izay olona mety manana vaovao hanampy amin’ny fitadiavana ireo fanafody voalaza fa nisy nangalatra tao amin’ny seranana ireo.

Sitraka Rajaonarivony