Hotanterahina ny adina ara-panatanjahan-tena ho an’ny mpianatra hiatrika ny Bacc
Na teo aza ny hamehana ara-pahasalamana nanakatonana ny fampianarana teto Madagasikara, dia tsy natao amabin-javatra ny fampianarana ireo zanaka Malagasy hanala ny fanadinam-panjakana ho amin’ity taona ity. Mikasika manokana ny fanadinam-panjakana Baccalauréat. Hisy ny adina ara-panatanjahan-tena amin’ity taona ity, hoy ny Minisiteran’ny Fampianarana ambony sy ny fikarohana siantifika.
Afaka misafidy izay fomba hanatanterahana azy ny mpianatra tsirairay, na am-bava izany na ampiharina. Nilaza ihany anefa ny avy ao amin’izany Minisitera izany fa ny fanatanjahan-tena iombonana no tsy misy ho amin’ity taona ity. Ilaina mialohan’io adina ara-pantanjahan-tena io ihany koa ny valin’ny fitiliana ara-pahasalamana natao. « Tsy afaka miatrika ny adina ara-panatanjahantena ampiharina aho noho ny olana ara-pahasalamana mahazo ahy ka tsy hahafahako manao izany » hoy ny mpianatra mpanala fanadinana iray. Manana ny safidy toy ny isan-taona araka izany ny mpanala fanadinana tsirairay. Hanomboka ny 28 jona izao izany adina ara-panatanjahan-tena izany ho an’ny toerana manodidina ny renivohitra fa manomboka ny 15 jolay kosa raha ho an’Antananarivo manokana ka mandritra ny 15 andro no hamitana izany.
Nicole Rafalimananjara
