France : Patrick Dils, nisedra ny fahadisoana ara-pitsarana lehibe indrindra tao an-toerana
Teraka ny 30 jona 1970 tao Longeville-lès-Metz i Patrick Dils. Izy no zaza tsy ampy taona niharan’ny sazy mandrapahafaty voalohany tao France. Tamin’ny 30 aprily 1987, teo amin’ny faha 16 taonany dia voapanga ho namono ankizilahy roa mpiray vodirindrina taminy tao Montigny-lès-Metz, Moselle, ny tenany.
Ny 27 janoary 1989 dia nivoaka ny didim-pitsarana manameloka azy am-ponja mandrapahafatiny. In’enina niampangana an’i Patrick Dils ary nolaviny avokoa izany, saingy noho ny faneren’ireo mpanao famotorana hoy izy dia nanaiky tsy fidiny ny heloka tsy nataony akory izy.
Ny 24 Aprily 2002 kosa no nivoaka ny fonja izy rehefa avy nodinihina indray ny raharaha niampangana azy. Fantatra tamin’izany fa tsy meloka tokoa ny tenany rehefa avy nanefa sazy 15 taona an-tranomaizina ho an’olon-kafa. Nandoa honitra 1 146 000 Euros taminy kosa ny fanjakana frantsay vokatr’io fahadisoana ara-pitsarana io.
