Fianarantsoa : Voatery miakatra an-drenivohitra ireo marary

Tsy mandeha ny « scanner » ao amin’ny Hopitaly Fianarantsoa. Voatery miakatra aty an-drenivohitra noho izany ireo marary mila izany. « Mijaly ny marary mila scanner eto Fianarantsoa. Ny scanner simba efa fotoana maro izay. Tsy zarizary ny fitaovana entina mitsabo kanefa ny fianakaviana mamoaka vola foana » hoy ny fianakaviana iray manana marary.

« Voatery entina miakatra amin’ny fiarakodia amin’ny halaviran-dalana 400km mandritra ny 9 ora ilay marary mafy. Miaraka amin’ny dokotera izay aloa vola, ny fanafody ilaina an-dalana rehetra. Maro ireo mamoy ny ainy eny an-dalana » hoy i Feno, mponina ao Fianarantsoa. « Tsy i Fianarantsoa irery akory no simba ny scanner. Tsy misy ireo fikojakojana izany hany ka mora simba izy » hoy ny fanazavana nomen’ireo mpitsabo ao amin’ity hopitaly ity. Ny scanner anefa dia tena ilaina amin’ny fitiliana ireo marary maro. Aina no vonjena, ary tsy kilalao izany.

Nicole Rafalimananjara