Mayotte : Ho omem-boninahitra indray ny vehivavy
Isaky ny fankalazana ny andron’ny 8 martsa dia omem-boninahitra hatrany ireo vehivavy ao Mayotte. Amin’ity taona ity dia hisy ny hetsika « Suku ya mtrumché » midika hoe andron’ny vehivavy karakarain’ny vondrom-piarahamonina Dembéni-Mamoudzou ao amin’ny amin’ny kianjan’ny repoblika ao Mamoudzou.
Omem-kaja indrindra amin’io andro io ny vehivavy hoy ny talen’ny biraon’ny fizahantany ao Cadéma, Carine Medar izay mpamolavola ny tetik’asa. Tanjona amin’ny hetsika hoy izy ny fanindrahindrana ny vehivavy ao Mayotte amin’ny alalan’ireto lohahevitra enina ireto dia ny fisorohana sy ny ady amin’ny herisetra mifototra amin’ny mahalahy sy ny mahavavy ary ny ara-nofo ; ny fitovian-jo eo amin’ny sehatry ny asa sy ny fizakan-tena ara-bola; ny zo ara-pahasalamana, ara-tsosialy ary ara-politika ; ny toeran’ny vehivavy eo amin’ny haino aman-jery, kolontsaina, fanatanjahantena; ary ny fitovian’ny lahy sy ny vavy ao amin’ny faritanin’i Mayotte.
