Anosy : Manana ny tantarany ny farihy sy ny anjely mainty

Ny mpanjaka Ranavalona I no nampamboatra ny farihin’Anosy. Nampihady ny tany, nampanao ny nosy kely teo ampovoany ary nampanao fitarihin-drano avy eny Ambohimahavelona hamenoan-drano azy ary nisy tranokotona 3 teo amin’ny nosy afovoany.

Novolena tatamo sy zozoro teny anaty rano ary voaroihazo kosa no nambolena teny amin’ny sisin-drano. Taty aoriana vao novolena hazo malahelo ny sisin-drano sy ny sisin-dalana niditra nankao. Nisy voay sy vorona nompiana tao, ary nasiana olona nipetraka hitandrina ny hasin’ny toerana sy hanome sakafon’ireo biby ireo.

Tsy resaka fialamboly na toerana fialan-tsasatra ihany nefa no nanaovan-dRanavalona I ny farihin’Anosy, fa mba hampisy hasina ny tanàna, toy ny nametrahany ny vatomasina teo Mahamasina tamin’ny 13 Alakarabo 1843. Fiarovana amin’ireo mpanani-bohitra vahiny, ireo voay sy vorona nompiana tao no manome fambara amin’ny fihavin’ny mpanafika sy ireo olon-dratsy fahiny.

Fitahirizan-drano namatsiana ny orinasa mpanao vanja teo Isoraka, sy namatsiana herinaratra voalohany nentina nanazava ny Rova, talohan’ny nisian’ny « générateur à vapeur » teo akaikin’Avaradrova.

Ny taona 1926 dia naorin’ny Frantsay teo ny Tsangambato Fahatsiarovana ny Malagasy sy Frantsay maty tamin’ny Ady Lehibe 1914-1918. Mpanakanto Frantsay Barberia, mpanao asa sikotra, sy Perrin, mpanao ravaka no nanao ny endrika amam-bikan’izany.